نئی جفا کا مجھے اب تو کوئی باب نہ دے
Parvez Ahmad Parvez (b. 1968)نئی جفا کا مجھے اب تو کوئی باب نہ دے
میں جس کو پڑھ کے بہک جاؤں وہ کتاب نہ دے
خدا بنا تو لیا میں نے ایک پتھر کو
سوال کیسے کروں جب کہ وہ جواب نہ دے
اگا دے درد کا سورج ہمارے گھر میں مگر
جلا دے روشنی جس کی وہ ماہتاب نہ دے
چمن چمن میں وہ پھولوں کا بادشاہ سہی
مگر جو رنگ مرا زخم دے گلاب نہ دے
چبھے جو خار کی مانند ہر نفس پرویزؔ
ستا لے مجھ کو مگر کوئی ایسا خواب نہ دے
nai jafa ka mujhe ab to koi bab na de
main jis ko parh ke bahak jaun wo kitab na de
khuda bana to liya main ne ek patthar ko
sawal kaise karun jab ke wo jawab na de
uga de dard ka suraj hamare ghar mein magar
jala de raushni jis ki wo mahtab na de
chaman chaman mein wo phulon ka badshah sahi
magar jo rang mira zakhm de gulab na de
chubhe jo khar ki manind har nafas parwez
sata le mujh ko magar koi aisa khwab na de