یہ کس نے عہد فراموش سے صدا دی ہے

یہ کس نے عہد فراموش سے صدا دی ہے

ابھی چراغ جلائے ہی تھے ہوا دی ہے

یہ ورثہ ہم سے نئی نسل کو کبھی نہ ملے

زباں ہمارے بزرگوں نے بے نوا دی ہے

خراج آرزوئے موسم بہار ہے یہ

لہو لہو جو مرے پیرہن کی وادی ہے

کوئی بھی گھر سے نہ نکلے چراغ دل لے کر

امیر شہر کی یہ شہر میں منادی ہے

ملی ہے یہ مہ و انجم سے دوستی کی سزا

کہ آفتاب نے بینائی تک جلا دی ہے

کہاں سے کاٹو گے کل تم مسرتیں عابدؔ

یہ فصل اشک جو ہر آنکھ میں اگا دی ہے

ye kis ne ahd-e-faramosh se sada di hai

abhi charagh jalae hi the hua di hai

ye wirsa ham se nai nasl ko kabhi na mile

zaban hamare buzurgon ne be nawa di hai

khiraj arzu-e-mausam-e-bahar hai ye

lahu lahu jo mire pairahan ki wadi hai

koi bhi ghar se na nikle charagh-e-dil le kar

amir-e-shahr ki ye shahr mein munadi hai

mili hai ye mah-o-anjum se dosti ki saza

ke aftab ne binai tak jala di hai

kahan se katoge kal tum masarraten abid

ye fasl-e-ashk jo har ankh mein uga di hai