درد کی آنچ میں جلتا ہے یہ گھر کیا کیجے

درد کی آنچ میں جلتا ہے یہ گھر کیا کیجے

خواب ہوتی ہے تمنا کی سحر کیا کیجے

ہم بھی مانوس نہیں دل کے اندھیروں سے ابھی

طائر شب بھی ہے کھولے ہوئے پر کیا کیجے

دور منزل ہے کڑی دھوپ میں کرنا ہے سفر

کٹ گئے راہ میں جتنے تھے شجر کیا کیجے

وہ گئے وقت کی مانند نہ لوٹے گا کبھی

اب لٹا کر یہ وفاؤں کے گہر کیا کیجے

بے گواہی کے بھنور میں ہے مری ذات کہ اب

آنکھ کی جھیل بھی ہوتی نہیں تر کیا کیجے

بارش سنگ تو بے وجہ نہیں ہے عابدؔ

آ گیا مجھ کو وفاؤں کا ہنر کیا کیجے

dard ki anch mein jalta hai ye ghar kya kije

khwab hoti hai tamanna ki sahar kya kije

ham bhi manus nahin dil ke andheron se abhi

tair-e-shab bhi hai khole hue par kya kije

dur manzil hai kari dhup mein karna hai safar

kat gae rah mein jitne the shajar kya kije

wo gae waqt ki manind na lautega kabhi

ab luta kar ye wafaon ke guhar kya kije

be gawahi ke bhanwar mein hai miri zat ke ab

ankh ki jhil bhi hoti nahin tar kya kije

barish-e-sang to be wajh nahin hai abid

a gaya mujh ko wafaon ka hunar kya kije