عبث ہے شاخ قد آور پہ آشیاں رکھنا

عبث ہے شاخ قد آور پہ آشیاں رکھنا

زمیں کو راس کب آیا ہے آسماں رکھنا

سفر کرو کہ ٹھہر جاؤ اک عذاب ہے یہ

قدم کو ہجرت و منزل کے درمیاں رکھنا

کسی کا شور فغاں سن کے یاد آیا بہت

فصیل غم میں مرا درد بے زباں رکھنا

کھلی فضا میں تو شبنم بھی بار لگتی ہے

اگر ہے طرز کہن سر پہ سائباں رکھنا

یہ لوگ اپنی ہی دیوار کے نقب زن ہیں

کبھی نہ بھول کے تم گھر کا پاسباں رکھنا

ہے ناؤ موجوں کی زد میں مگر ہمیں عابدؔ

نہ آیا باد مخالف پہ بادباں رکھنا

abas hai shakh qad awar pe ashiyan rakhna

zamin ko ras kab aya hai asman rakhna

safar karo ke thahar jao ik azab hai ye

qadam ko hijrat-o-manzil ke darmiyan rakhna

kisi ka shor-e-fughan sun ke yad aya bahut

fasil-e-gham mein mira dard-e-be zaban rakhna

khuli faza mein to shabnam bhi bar lagti hai

agar hai tarz-e-kuhan sar pe saiban rakhna

ye log apni hi diwar ke naqb zan hain

kabhi na bhul ke tum ghar ka pasban rakhna

hai nao maujon ki zad mein magar hamen abid

na aya bad-e-mukhalif pe badban rakhna