اشک امڈیں تو انہیں پلکوں پہ روکا جائے

اشک امڈیں تو انہیں پلکوں پہ روکا جائے

کیوں یہ پندار وفا صورت گریہ جائے

جب سے دیکھے ہیں تری آنکھوں کے ساگر ہم نے

اک نئی آرزو ابھری ہے کہ ڈوبا جائے

میں سماعت میں سمیٹے ہوں ہزاروں دشنام

ضبط غم کا ہے یہ ارشاد نہ بولا جائے

ہم کو اس خواب محبت سے جگایا کس نے

نقش چہروں پہ عداوت کا نہ دیکھا جائے

زخم خوردہ نہ کہیں انگلیاں وحشت ہو جائیں

بربط دل کو کسی کے نہ یوں چھیڑا جائے

دل ہے مصلوب انا بام پہ سورج بھی نہیں

کس طرح گھر کے اندھیروں کو اجالا جائے

پاؤں جب خار مغیلاں سے ہیں چھلنی عابدؔ

کیوں نہ پھر آتش نمرود میں اترا جائے

ashk umden to unhen palkon pe roka jae

kyun ye pindar-e-wafa surat-e-girya jae

jab se dekhe hain tiri ankhon ke sagar ham ne

ik nai arzu ubhri hai ke duba jae

main samaat mein samete hun hazaron dushnam

zabt-e-gham ka hai ye irshad na bola jae

ham ko is khwab-e-mohabbat se jagaya kis ne

naqsh chehron pe adawat ka na dekha jae

zakhm khurda na kahin ungliyan wahshat ho jaen

barbat-e-dil ko kisi ke na yun chhera jae

dil hai maslub-e-ana bam pe suraj bhi nahin

kis tarah ghar ke andheron ko ujala jae

paon jab khar-e-mughilan se hain chhalni abid

kyun na phir atish-e-namrud mein utra jae