ہم کو جاناں اس نگری میں چلنا بھی دشوار ہوا

لوگوں کا ہر سنگ ملامت اپنے لیے دیوار ہوا

دل کے سب دکھڑے دل میں ہیں پھر بھی انہیں یہ شکوہ ہے

چاک گریباں کیوں پھرتے ہو دامن کیوں ہے تار ہوا

صبح سے ہلکی ہلکی کسک تھی میٹھا میٹھا درد سا تھا

شام کا پہلا تارا ابھرا زخم جگر بیدار ہوا

خود کو ملامت کیوں کرتے ہو اپنے آپ سے شکوہ کیا

جان کے کب دھوکا کھایا ہے انجانے میں پیار ہوا

ہم کو خرد کی راہ دکھانے والے یہ کیوں بھول گئے

اپنے لیے اس راہ جنوں میں صحرا بھی گلزار ہوا