زیاں ہی ہے زیاں ہم سے نہ پوچھو

زیاں ہی ہے زیاں ہم سے نہ پوچھو

یہ غیروں کی زباں ہم سے نہ پوچھو

سنا سکتے نہیں حال الم میں

ہماری داستاں ہم سے نہ پوچھو

ہم اپنی ذات تک محدود ہیں دوست

خیال عاشقاں ہم سے نہ پوچھو

رہے ہیں زندگی بھر سادگی سے

خرافات جہاں ہم سے نہ پوچھو

کرو محسوس خود ہی بات سچی

یقیں ہے اب کہاں ہم سے نہ پوچھو

ہے کتنا تلخ کڑوا نفرت آمیز

اب انداز بیاں ہم سے نہ پوچھو

سجایا ہے گلوں سے باغ سارا

کمال باغباں ہم سے نہ پوچھو

جدھر دیکھو عناد و بغض کی دھار

ہے ملا کی اذاں ہم سے نہ پوچھو

کرو ادراک ہر اک گفتگو کا

ہیں کیا گستاخیاں ہم سے نہ پوچھو

برا مانیں گے کہہ دی گر حقیقت

سلوک دوستاں ہم سے نہ پوچھو

رقیبوں کی رقابت کیا بتائیں

وہ دیں گے گالیاں ہم سے نہ پوچھو

رہے ہیں ہم بھٹکتے خود ہی سہگلؔ

سو منزل کا نشاں ہم سے نہ پوچھو

ziyan hi hai ziyan ham se na puchho

ye ghairon ki zaban ham se na puchho

suna sakte nahin hal-e-alam mein

hamari dastan ham se na puchho

ham apni zat tak mahdud hain dost

khayal-e-ashiqan ham se na puchho

rahe hain zindagi bhar sadgi se

khurafat jahan ham se na puchho

karo mahsus khud hi bat sachchi

yaqin hai ab kahan ham se na puchho

hai kitna talkh karwa nafrat amez

ab andaz-e-bayan ham se na puchho

sajaya hai gulon se bagh sara

kamal-e-baghban ham se na puchho

jidhar dekho inad-o-bughz ki dhar

hai mila ki azan ham se na puchho

karo idrak har ik guftugu ka

hain kya gustakhiyan ham se na puchho

bura manenge kah di gar haqiqat

suluk-e-dostan ham se na puchho

raqibon ki raqabat kya bataen

wo denge galiyan ham se na puchho

rahe hain ham bhatakte khud hi sahgul

so manzil ka nishan ham se na puchho