افسانۂ حیات کو دہرا رہے ہیں ہم

افسانۂ حیات کو دہرا رہے ہیں ہم

اپنے کئے کی آپ سزا پا رہے ہیں ہم

اے چشم یار تیری نگاہوں کا شکریہ

اب زندگی و موت کو بہلا رہے ہیں ہم

چھیڑا تھا ہم نے ذکر کسی بزم ناز کا

کہنے لگے وہ ہنس کے چلو آ رہے ہیں ہم

یہ رہ گزر ہے کون سی کچھ سوجھتا نہیں

اے بے خودی بتا کہ کہاں جا رہے ہیں ہم

چھیڑا جو ہم نے راہ میں زاہد نے یہ کہا

پھر آج میکدے کی طرف جا رہے ہیں ہم

تاریک رہ گزر نے بڑے فخر سے کہا

اب روشنیؔ کے گیت غزل گا رہے ہیں ہم

afsana-e-hayat ko dohra rahe hain ham

apne kiye ki ap saza pa rahe hain ham

ai chashm-e-yar teri nigahon ka shukriya

ab zindagi-o-maut ko bahla rahe hain ham

chhera tha ham ne zikr kisi bazm-e-naz ka

kahne lage wo hans ke chalo a rahe hain ham

ye rah guzar hai kaun si kuchh sujhta nahin

ai be khudi bata ke kahan ja rahe hain ham

chhera jo ham ne rah mein zahid ne ye kaha

phir aj maikade ki taraf ja rahe hain ham

tarik rah guzar ne bare fakhr se kaha

ab raushni ke git ghazal ga rahe hain ham