تبدیلیوں کی راہ پہ چلنے تو دے مجھے

تبدیلیوں کی راہ پہ چلنے تو دے مجھے

خود کو بدل رہا ہوں بدلنے تو دے مجھے

بچہ نہیں ہوں میں جو بھٹک جاؤں گا کہیں

تنہا رہ حیات میں چلنے تو دے مجھے

جلتا ہوا چراغ اگر ہے مرا وجود

پھر اپنے دل کے طاق میں جلنے تو دے مجھے

گر میری دسترس میں نہیں آسماں کا چاند

مہتاب صورتوں سے بہلنے تو دے مجھے

بن جاؤں گا کرن تری صبح جمال کی

تو اپنے رنگ روپ میں ڈھلنے تو دے مجھے

بار غم حیات اٹھا لوں گا اور بھی

اے انقلاب دہر سنبھلنے تو دے مجھے

دم توڑ دیں گی خود ہی پرانی روایتیں

آئین ملک شوق بدلنے تو دے مجھے

مل جائے گا مجھے بھی اجالوں کا راستہ

زندان تیرگی سے نکلنے تو دے مجھے

tabdiliyon ki rah pe chalne to de mujhe

khud ko badal raha hun badalne to de mujhe

bachcha nahin hun main jo bhatak jaunga kahin

tanha rah-e-hayat mein chalne to de mujhe

jalta hua charagh agar hai mira wajud

phir apne dil ke taq mein jalne to de mujhe

gar meri dastaras mein nahin asman ka chand

mahtab suraton se bahalne to de mujhe

ban jaunga kiran tiri subh-e-jamal ki

tu apne rang rup mein dhalne to de mujhe

bar-e-gham-e-hayat utha lunga aur bhi

ai inqilab-e-dahr sambhalne to de mujhe

dam tor dengi khud hi purani riwayaten

ain-e-mulk-e-shauq badalne to de mujhe

mil jaega mujhe bhi ujalon ka rasta

zindan-e-tirgi se nikalne to de mujhe