سر اشجار تحریر ہوا اچھی نہیں لگتی

سر اشجار تحریر ہوا اچھی نہیں لگتی

ہمیں پت جھڑ میں گلشن کی فضا اچھی نہیں لگتی

گلی کوچوں پہ یہ کیسا سکوت مرگ طاری ہے

فضائے شہر بے صوت و صدا اچھی نہیں لگتی

پس تصویر ہو جب ایک رنگ آتش و آہن

تری تصویر اے دنیا ذرا اچھی نہیں لگتی

وہی ہے بھوک اہل زر کی لیکن لوگ کہتے ہیں

بھرا ہو پیٹ تو کوئی غذا اچھی نہیں لگتی

تعجب ہے ہمیں ان پر جنہیں اپنے گلستاں کی

زمیں اچھی نہیں لگتی فضا اچھی نہیں لگتی

ادھورا ہے ابھی ذوق تماشائے جمال اپنا

کوئی صورت سر شہر وفا اچھی نہیں لگتی

کرے کیا چارہ گر ایسے مریضوں کا جنہیں شاہدؔ

علاج اچھا نہیں لگتا دوا اچھی نہیں لگتی

sar ashjar tahrir hua achchhi nahin lagti

hamen pat jhar mein gulshan ki faza achchhi nahin lagti

gali kuchon pe ye kaisa sukut-e-marg tari hai

faza-e-shahr-e-be saut-o-sada achchhi nahin lagti

pas taswir ho jab ek rang atish-o-ahan

tiri taswir ai duniya zara achchhi nahin lagti

wahi hai bhuk ahl-e-zar ki lekin log kahte hain

bhara ho pet to koi ghiza achchhi nahin lagti

taajjub hai hamen un par jinhen apne gulistan ki

zamin achchhi nahin lagti faza achchhi nahin lagti

adhura hai abhi zauq-e-tamasha-e-jamal apna

koi surat sar-e-shahr-e-wafa achchhi nahin lagti

kare kya chara gar aise marizon ka jinhen shahid

ilaj achchha nahin lagta dawa achchhi nahin lagti