وہ مجھ میں تھا نہاں میں دیکھتا کیا

وہ مجھ میں تھا نہاں میں دیکھتا کیا

پس دیوار جاں میں دیکھتا کیا

کتاب زندگی زیر نظر تھی

حدیث دلبراں میں دیکھتا کیا

مجھے چلنا تھا اپنے راستے پر

نشان رفتگاں میں دیکھتا کیا

نظر میں تھا وہ مہتاب تمنا

جمال کہکشاں میں دیکھتا کیا

فنا کی زد پہ تھا بازار دنیا

یہاں سود و زیاں میں دیکھتا کیا

مری آنکھیں بھری تھیں آنسوؤں سے

سر شہر فغاں میں دیکھتا کیا

ٹھکانا تھا مرا دشت جنوں میں

خرد کی بستیاں میں دیکھتا کیا

مری مجبوریاں بھی کم نہیں تھیں

تری مجبوریاں میں دیکھتا کیا

اسے جب امتحاں لینا نہیں تھا

نصاب امتحاں میں دیکھتا کیا

مری پرواز تھی شاہدؔ فلک پر

زمیں کی پستیاں میں دیکھتا کیا

wo mujh mein tha nihan mein dekhta kya

pas-e-diwar-e-jan mein dekhta kya

kitab-e-zindagi zer-e-nazar thi

hadis-e-dilbaran mein dekhta kya

mujhe chalna tha apne raste par

nishan-e-raftagan mein dekhta kya

nazar mein tha wo mahtab-e-tamanna

jamal-e-kahkashan mein dekhta kya

fana ki zad pe tha bazar-e-duniya

yahan sud-o-ziyan mein dekhta kya

miri ankhen bhari thin ansuon se

sar-e-shahr-e-fughan mein dekhta kya

thikana tha mira dasht-e-junun mein

khirad ki bastiyan mein dekhta kya

miri majburiyan bhi kam nahin thin

tiri majburiyan mein dekhta kya

use jab imtihan lena nahin tha

nisab-e-imtihan mein dekhta kya

miri parwaz thi shahid falak par

zamin ki pastiyan mein dekhta kya