بے ارادہ کوچۂ قاتل میں جانا پڑ گیا

بے ارادہ کوچۂ قاتل میں جانا پڑ گیا

پھر ہمیں اپنا مقدر آزمانا پڑ گیا

کیا کرو گے جب کبھی شہر تمنا میں تمہیں

ہم سے بے آباد لوگوں کو بسانا پڑ گیا

اپنے بگڑے خال و خد کو آئنے میں دیکھ کر

آئنہ اک آئینہ گر کو دکھانا پڑ گیا

دیکھ کر اس کا رویہ خود بجھایا تھا جسے

وہ چراغ آرزو پھر سے جلانا پڑ گیا

حدت جذبات سے جلنے لگا تھا تن بدن

پھر تھپک کر ان شراروں کو سلانا پڑ گیا

کیا کہیں ہم موسموں کے دیوتا کو کس لیے

دشت و صحرا میں بگولوں کو سجانا پڑ گیا

دیکھنا اہل چمن شاہدؔ بلائیں گے ہمیں

جب چمن کو باد‌ صر‌صر سے بچانا پڑ گیا

be irada kucha-e-qatil mein jana par gaya

phir hamen apna muqaddar azmana par gaya

kya karoge jab kabhi shahr-e-tamanna mein tumhen

ham se be abad logon ko basana par gaya

apne bigre khal-o-khad ko aine mein dekh kar

aina ik aina gar ko dikhana par gaya

dekh kar us ka rawayya khud bujhaya tha jise

wo charagh-e-arzu phir se jalana par gaya

hiddat-e-jazbat se jalne laga tha tan badan

phir thapak kar in shararon ko sulana par gaya

kya kahen ham mausamon ke dewta ko kis liye

dasht-o-sahra mein bagulon ko sajana par gaya

dekhna ahl-e-chaman shahid balaenge hamen

jab chaman ko bad-e-sarsar se bachana par gaya