ہر سمت زندگی کا تماشا بھی خوب ہے

ہر سمت زندگی کا تماشا بھی خوب ہے

دنیا بھی خوب رونق دنیا بھی خوب ہے

جس شہر میں کسی کو کسی کی خبر نہیں

اس شہر لا جواب میں جینا بھی خوب ہے

میخانۂ حیات کا احوال کیا لکھوں

ساقی بھی خوب ساغر صہبا بھی خوب ہے

پی کر شراب گم میں رہوں اپنے ہوش میں

اے زندگی یہ تیرا تقاضا بھی خوب ہے

دیکھا ہے میں نے اس کے زیاں میں بھی فائدہ

بازار آرزو کا خسارا بھی خوب ہے

ہوتی ہے اولیں ہی ملاقات آخری

انسان کا یہ موت سے رشتہ بھی خوب ہے

مدت سے چل رہا ہوں مگر طے نہ کر سکا

شاہدؔ یہ راہ راست تمنا بھی خوب ہے

har samt zindagi ka tamasha bhi khub hai

duniya bhi khub raunaq-e-duniya bhi khub hai

jis shahr mein kisi ko kisi ki khabar nahin

is shahr la jawab mein jina bhi khub hai

maikhana-e-hayat ka ahwal kya likhun

saqi bhi khub saghar-e-sahba bhi khub hai

pi kar sharab gum mein rahun apne hosh mein

ai zindagi ye tera taqaza bhi khub hai

dekha hai main ne us ke ziyan mein bhi faida

bazar arzu ka khasara bhi khub hai

hoti hai awwalin hi mulaqat akhiri

insan ka ye maut se rishta bhi khub hai

muddat se chal raha hun magar tai na kar saka

shahid ye rah-e-rast-e-tamanna bhi khub hai