کیوں قتل کے ارمان میں آزار اٹھائیں

کیوں قتل کے ارمان میں آزار اٹھائیں

گردن مری حاضر ہے وہ تلوار اٹھائیں

روکے سے مری طبع رواں رک نہ سکے گی

رستے میں مرے لاکھ وہ دیوار اٹھائیں

جو دل میں تمہارے ہے بتا کیوں نہیں دیتے

صدمہ جو اٹھانا ہے تو یکبار اٹھائیں

کیوں لوگ ہیں خاموش زبوں حال پہ اپنے

آواز سر کوچہ و بازار اٹھائیں

خود ہی جو پس پردۂ اسرار چھپے ہیں

وہ کیسے بھلا پردۂ اسرار اٹھائیں

نیلام جو کرتے ہیں یہاں جنس وفا کو

ممکن ہی نہیں ناز خریدار اٹھائیں

یہ جرم محبت نہیں واعظ کا مقدر

یہ بار گناہ ہم سے گنہ گار اٹھائیں

پھرتے ہیں جو آزاد انہیں کیسے خبر ہو

زنداں میں جو تکلیف گرفتار اٹھائیں

شاہدؔ یہی لکھا ہے مقدر میں ہمارے

صدمات زمانے میں لگاتار اٹھائیں

kyun qatl ke arman mein azar uthaen

gardan miri hazir hai wo talwar uthaen

roke se miri tab-e-rawan ruk na sakegi

raste mein mire lakh wo diwar uthaen

jo dil mein tumhare hai bata kyun nahin dete

sadma jo uthana hai to yakbar uthaen

kyun log hain khamosh zabun hal pe apne

awaz-e-sar kucha-o-bazar uthaen

khud hi jo pas-e-parda-e-asrar chhupe hain

wo kaise bhala parda-e-asrar uthaen

nilam jo karte hain yahan jins-e-wafa ko

mumkin hi nahin naz kharidar uthaen

ye jurm-e-mohabbat nahin waiz ka muqaddar

ye bar-e-gunah ham se gunah gar uthaen

phirte hain jo azad unhen kaise khabar ho

zindan mein jo taklif giraftar uthaen

shahid yahi likha hai muqaddar mein hamare

sadmat zamane mein lagatar uthaen