یہ کیف کیف محبت ہے کوئی کیا جانے

یہ کیف کیف محبت ہے کوئی کیا جانے

چھلک رہے ہیں نگاہوں میں دل کے پیمانے

کہانیوں ہی پہ بنیاد ہے حقیقت کی

حقیقتوں ہی سے پیدا ہوئے ہیں افسانے

نہ اب وہ آتش نمرود ہے نہ شعلۂ طور

تری نگاہ کو کیا ہو گیا خدا جانے

ہزار تیری محبت نے رہنمائی کی

گزر سکے نہ مقام جنوں سے دیوانے

انہی کو حاصل یک شہر آرزو کہیے

مری نگاہ میں آباد ہیں جو ویرانے

تجھے خبر بھی ہے اس دور‌ خستہ حالی میں

خود اہل دل ہیں مذاق وفا سے بیگانے

جنوں فریب خرد ہے خرد فریب نظر

مجھے کہیں کا نہ رکھا مری تمنا نے

ye kaif kaif-e-mohabbat hai koi kya jane

chhalak rahe hain nigahon mein dil ke paimane

kahaniyon hi pe buniyad hai haqiqat ki

haqiqaton hi se paida hue hain afsane

na ab wo atish-e-namrud hai na shola-e-tur

tiri nigah ko kya ho gaya khuda jane

hazar teri mohabbat ne rahnumai ki

guzar sake na maqam-e-junun se diwane

unhi ko hasil yak shahr-e-arzu kahiye

miri nigah mein abad hain jo wirane

tujhe khabar bhi hai is daur khasta hali mein

khud ahl-e-dil hain mazaq-e-wafa se begane

junun fareb-e-khirad hai khirad fareb-e-nazar

mujhe kahin ka na rakha miri tamanna ne