مرے جنوں کو ہے طوفان رنگ و بو کی تلاش

مرے جنوں کو ہے طوفان رنگ و بو کی تلاش

فروغ آتش گل کو مرے لہو کی تلاش

خرد کی خیرہ مذاقی جنوں کی جولانی

ہے زخم سوزن غم رشتۂ رفو کی تلاش

عروس گل تو ابھی حجلۂ خیال میں ہے

کہ شاخ گل کو ہے صد جوشش نمو کی تلاش

ہے سست گام بہت کاروان شوق ابھی

رحیل وقت کو سرگرم جستجو کی تلاش

ازل سے مثل زمیں گردش مدام میں ہے

عجب ہے ذرۂ شوریدہ آرزو کی تلاش

عطائے عشق ہے صہبائے آبگینہ گزار

نہیں مجھے کسی پیمانہ و سبو کی تلاش

mire junun ko hai tufan-e-rang-o-bu ki talash

farogh-e-atish-e-gul ko mire lahu ki talash

khirad ki khira mazaqi junun ki jaulani

hai zakhm-e-sozan gham rishta-e-rafu ki talash

urus-e-gul to abhi hajla-e-khayal mein hai

ke shakh-e-gul ko hai sad joshish-e-numu ki talash

hai sust gam bahut karwan-e-shauq abhi

rahil waqt ko sargarm-e-justuju ki talash

azal se misl-e-zamin gardish-e-mudam mein hai

ajab hai zarra-e-shorida arzu ki talash

ata-e-ishq hai sahba-e-abgina guzar

nahin mujhe kisi paimana-o-subu ki talash