خواہش وصل نے عشاق کو رسوا رکھا

خواہش وصل نے عشاق کو رسوا رکھا

حسن نے دل کش و خوش رنگ سراپا رکھا

اپنے کردار کے داغوں کو چھپانے کے لیے

میرے اعمال پہ تنقید کو برپا رکھا

میرے ناکردہ گناہوں کی نمائش کے لیے

مجھ کو زنداں میں لگا کر بڑا تالا رکھا

صاف انکار نہ کرنے کے بدل ظالم نے

میری دل بستگی کو وعدۂ فردا رکھا

کون سی چیز گرانی کی بلندی پہ نہیں

خون ناحق مگر اس دور نے سستا رکھا

کر کے محروم انہیں آب رواں سے ہم نے

نام بے آب گزر گاہوں کا دریا رکھا

اپنے قد سے مرا قد دیکھا نکلتا جو طہورؔ

کر کے سر میرا قلم اپنا سر اونچا رکھا

khwahish-e-wasl ne ushshaq ko ruswa rakha

husn ne dil kash-o-khush rang sarapa rakha

apne kirdar ke daghon ko chhupane ke liye

mere aamal pe tanqid ko barpa rakha

mere nakarda gunahon ki numaish ke liye

mujh ko zindan mein laga kar bara tala rakha

saf inkar na karne ke badal zalim ne

meri dil bastagi ko waada-e-farda rakha

kaun si chiz girani ki bulandi pe nahin

khun-e-nahaq magar is daur ne sasta rakha

kar ke mahrum unhen ab-e-rawan se ham ne

nam be ab guzar gahon ka dariya rakha

apne qad se mira qad dekha nikalta jo tahur

kar ke sar mera qalam apna sar uncha rakha