دھوپ میں بیٹھے ہیں بچے ہاتھ میں چھاگل لئے

دھوپ میں بیٹھے ہیں بچے ہاتھ میں چھاگل لئے

سو گئیں شاید ہوائیں گود میں بادل لئے

آ رہا ہے چپ کے تالابوں میں پتھر پھینکتا

اک جلوس کودکاں کو ساتھ اک پاگل لئے

ان اندھیری بستیوں میں رکھ نہ دروازہ کھلا

کون آتا ہے یہاں اپنائی کی مشعل لئے

ذات میں گم صم یوں ہی سڑکوں پہ دن بھر گھومنا

اور شب کو سوچنا پہلو میں دل بے کل لئے

کیا عجب اس پر مہک ہی جائیں درماں کے گلاب

ہے تو اک شاخ نظر امید کی کونپل لئے

آج تک بے سمتیوں کی رہروی نے کیا دیا

اب ذرا دم لے بھی لو بزمیؔ بہت کچھ چل لئے

dhup mein baithe hain bachche hath mein chhagal liye

so gain shayad hawaen god mein badal liye

a raha hai chup ke talabon mein patthar phenkta

ik julus-e-kaudakan ko sath ik pagal liye

un andheri bastiyon mein rakh na darwaza khula

kaun ata hai yahan apnai ki mashal liye

zat mein gum sum yun hi sarkon pe din bhar ghumna

aur shab ko sochna pahlu mein dil be kal liye

kya ajab us par mahak hi jaen darman ke gulab

hai to ik shakh-e-nazar ummid ki konpal liye

aj tak be samtiyon ki rahrawi ne kiya diya

ab zara dam le bhi lo bazmi bahut kuchh chal liye