کوئی سمجھا نہیں لگی دل کی

کوئی سمجھا نہیں لگی دل کی

بات دل میں سدا رہی دل کی

کتنے نایاب ہو گئے وہ لوگ

جو دعا لیتے تھے دکھی دل کی

مفلسی میں بھی دن کٹیں اچھے

ہو جو حاصل تونگری دل کی

ان دیوں کو بھی تو کرو روشن

دور کر دیں جو تیرگی دل کی

دل نہ چھوڑے اسے کہیں کا بھی

بات مانے جو آدمی دل کی

دوست سمجھا دیوں کا آندھی کو

اور کیا ہوگی سادگی دل کی

شہر سجتے رہے مگر ہاتفؔ

بزم سونی پڑی رہی دل کی

koi samjha nahin lagi dil ki

bat dil mein sada rahi dil ki

kitne nayab ho gae wo log

jo dua lete the dukhi dil ki

muflisi mein bhi din katen achchhe

ho jo hasil tawangari dil ki

in diyon ko bhi to karo raushan

dur kar den jo tirgi dil ki

dil na chhore use kahen ka bhi

bat mane jo admi dil ki

dost samjha diyon ka andhi ko

aur kiya hogi sadgi dil ki

shahr sajte rahe magar hataf

bazm suni pari rahi dil ki