وہ نظر بد گماں سی لگتی ہے

وہ نظر بد گماں سی لگتی ہے

زندگی رائیگاں سی لگتی ہے

بے یقینی سی بے یقینی ہے

ہر حقیقت گماں سی لگتی ہے

لب کو زحمت ہنسی کی کیا دیجے

جب ہنسی بھی فغاں سی لگتی ہے

شہر دل میں ہے کیسا سناٹا

خامشی بھی بیاں سی لگتی ہے

خوگر تیرگی ہوں جب آنکھیں

روشنی بھی دھواں سی لگتی ہے

کیسے گزرے گی زندگی ہاتفؔ

ہر گھڑی امتحاں سی لگتی ہے

wo nazar bad guman si lagti hai

zindagi raigan si lagti hai

be yaqini si be yaqini hai

har haqiqat guman si lagti hai

lab ko zahmat hansi ki kya dije

jab hansi bhi fughan si lagti hai

shahr-e-dil mein hai kaisa sannata

khamushi bhi bayan si lagti hai

khugar-e-tirgi hun jab ankhen

raushni bhi dhuan si lagti hai

kaise guzregi zindagi hataf

har ghari imtihan si lagti hai