بے قراری سی بے قراری ہے

بے قراری سی بے قراری ہے

سانس لینا بھی اب تو بھاری ہے

موت کو کس لئے کریں بدنام

زندگی زندگی سے ہاری ہے

آدمی اس سے بچ نہیں سکتا

وقت سب سے بڑا شکاری ہے

کیا ہوا گر نہیں خوشی اپنی

غم کی جاگیر تو ہماری ہے

شکل اپنی نہ دیکھیے اس میں

آئنہ جو چمک سے عاری ہے

شام کے رنج کو بھی یاد رکھے

چڑھتے سورج کا جو پجاری ہے

گلستاں آپ کا سہی لیکن

زندگی کس نے اس پہ واری ہے

be qarari si be qarari hai

sans lena bhi ab to bhari hai

maut ko kis liye karen badnam

zindagi zindagi se hari hai

admi us se bach nahin sakta

waqt sab se bara shikari hai

kya hua gar nahin khushi apni

gham ki jagir to hamari hai

shakl apni na dekhiye is mein

aina jo chamak se ari hai

sham ke ranj ko bhi yad rakhe

charhte suraj ka jo pujari hai

gulsitan ap ka sahi lekin

zindagi kis ne us pe wari hai