کوئی بھی نقش سلامت نہیں ہے چہرے کا

کوئی بھی نقش سلامت نہیں ہے چہرے کا

بدل گیا ہے کچھ ایسا چلن زمانے کا

میں کس لیے تجھے الزام بے وفائی دوں

کہ میں تو آپ ہی پتھر ہوں اپنے رستے کا

کوئی ہے رنگ کوئی روشنی کوئی خوشبو

جدا جدا ہے تأثر ہر ایک لمحے کا

وہ تیرگی ہے مسلط کہ آسمانوں پر

سراغ تک نہیں ملتا کسی ستارے کا

غضب تو یہ ہے مقابل کھڑا ہے وہ میرے

کہ جس سے میرا تعلق ہے خوں کے رشتے کا

تنا ہوا ہے وہاں آج خیمۂ خورشید

اگا ہوا تھا جہاں کل درخت سائے کا

وہ جا چکا ہے روپہلی رتوں کے ساتھ مگر

بھڑک رہا ہے ابھی تک چراغ سینے کا

گزر رہے ہیں یہ کس پل صراط سے ہم لوگ

کہ دل میں تابؔ گماں تک نہیں ہے جینے کا

koi bhi naqsh salamat nahin hai chehre ka

badal gaya hai kuchh aisa chalan zamane ka

main kis liye tujhe ilzam be wafai dun

ke main to ap hi patthar hun apne raste ka

koi hai rang koi raushni koi khushbu

juda juda hai tasar har ek lamhe ka

wo tirgi hai musallat ke asmanon par

suragh tak nahin milta kisi sitare ka

ghazab to ye hai muqabil khara hai wo mere

ke jis se mera taalluq hai khun ke rishte ka

tanna hua hai wahan aj khema-e-khurshid

uga hua tha jahan kal darakht sae ka

wo ja chuka hai rupehli ruton ke sath magar

bharak raha hai abhi tak charagh sine ka

guzar rahe hain ye kis pal sirat se ham log

ke dil mein tab guman tak nahin hai jine ka