میرے گلے پہ جمے ہاتھ میرے اپنے ہیں

میرے گلے پہ جمے ہاتھ میرے اپنے ہیں

جو لڑ رہے ہیں مرے ساتھ میرے اپنے ہیں

شکست کھا کے بھی میں فتح کے جلوس میں ہوں

کہ دے گئے جو مجھے مات میرے اپنے ہیں

میری طرح سے یہ کچے گھروں میں رہتے ہیں

جو گھیر لائے ہیں برسات میرے اپنے ہیں

اگر نہیں ہیں یہ شمس و قمر مرے بس میں

یہی بہت ہے یہ دن رات میرے اپنے ہیں

کوئی سنے نہ سنے کوئی داد دے کہ نہ دے

یہی بہت ہے خیالات میرے اپنے ہیں

کسی کے دل میں بسا ہوں کسی کی آنکھوں میں

یہ ٹوٹے پھوٹے کمالات میرے اپنے ہیں

mere gale pe jame hath mere apne hain

jo lar rahe hain mire sath mere apne hain

shikast kha ke bhi main fath ke julus mein hun

ke de gae jo mujhe mat mere apne hain

meri tarah se ye kachche gharon mein rahte hain

jo gher lae hain barsat mere apne hain

agar nahin hain ye shams-o-qamar mire bas mein

yahi bahut hai ye din rat mere apne hain

koi sune na sune koi dad de ke na de

yahi bahut hai khayalat mere apne hain

kisi ke dil mein basa hun kisi ki ankhon mein

ye tute phute kamalat mere apne hain