تری آواز پر رکے ہی نہیں

تری آواز پر رکے ہی نہیں

سو کئی واقعے ہوئے ہی نہیں

اس نے جتنے دئے میں لے آیا

مفت کے سانس تھے گنے ہی نہیں

معجزے وقت پر نہیں ہوتے

سانحے وقت دیکھتے ہی نہیں

جھوٹ ہے دل بدر کئے گئے ہیں

سچ کہیں ہم وہاں پہ تھے ہی نہیں

سب حقیقت پسند ہو گئے ہیں

لوگ اب خواب دیکھتے ہی نہیں

جو ترے نام میں نہیں آتے

ایسے حرفوں کو جانتے ہی نہیں

رس رہے ہیں جگہ جگہ سے اسدؔ

اس نے کچھ زخم تو سیے ہی نہیں

tiri awaz par ruke hi nahin

so kai waqie hue hi nahin

us ne jitne diye mein le aya

muft ke sans the gine hi nahin

mojize waqt par nahin hote

sanehe waqt dekhte hi nahin

jhut hai dil badar kiye gae hain

sach kahin ham wahan pe the hi nahin

sab haqiqat pasand ho gae hain

log ab khwab dekhte hi nahin

jo tire nam mein nahin ate

aise harfon ko jante hi nahin

ras rahe hain jagah jagah se asad

us ne kuchh zakhm to saye hi nahin