سانسوں کی روانی میں خلل آنے لگا ہے

سانسوں کی روانی میں خلل آنے لگا ہے

ٹھہرو کہ بچھڑ جانے کا پل آنے لگا ہے

کہتے ہو تو لہجے کی کمر سیدھی نہ کر لوں

مانا کہ مرے عجز پہ پھل آنے لگا ہے

یہ کیا کہ ہر اک وقت کی بیزار سماعت

ہر لفظ کی پیشانی پہ بل آنے لگا ہے

لاؤ مری آواز کی دستار اٹھا کر

کم ظرف کوئی حد سے نکل آنے لگا ہے

لو ختم ہوئی عمر مہ و سال کی گنتی

تمہید تھی جس کی وہی کل آنے لگا ہے

sanson ki rawani mein khalal ane laga hai

thahro ke bichhar jane ka pal ane laga hai

kahte ho to lahje ki kamar sidhi na kar lun

mana ke mire ijz pe phal ane laga hai

ye kya ke har ik waqt ki bezar samaat

har lafz ki peshani pe bal ane laga hai

lao miri awaz ki dastar utha kar

kam zarf koi had se nikal ane laga hai

lo khatm hui umr mah-o-sal ki ginti

tamhid thi jis ki wahi kal ane laga hai