سلے ہوں لب زبانیں بند تو باتیں نہیں ہوتیں

سلے ہوں لب زبانیں بند تو باتیں نہیں ہوتیں

مخالف راستے ہوں تو ملاقاتیں نہیں ہوتیں

یہ انسانوں پہ انسانوں کی فوقیت عجب شے ہے

رگوں کی دوڑتی سرخی میں تو ذاتیں نہیں ہوتیں

لکھی جاتی ہیں سنگینوں سے آزادی کی تحریریں

کہیں خود پیش آزادی کی سوغاتیں نہیں ہوتیں

جہاں شب خون مارا جا سکے خوابیدہ لوگوں پر

کسی بیدار ملت میں تو وہ راتیں نہیں ہوتیں

گھٹا سے چھینتے ہیں ایستادہ کوہ بارش کو

زمیں پر لیٹے صحراؤں پہ برساتیں نہیں ہوتیں

نفیرؔ اس دور خود آگاہ انسانوں کی دنیا میں

کہیں حاوی جواں مردوں پہ آفاتیں نہیں ہوتیں

sile hun lab zabanen band to baten nahin hotin

mukhalif raste hun to mulaqaten nahin hotin

ye insanon pe insanon ki fauqiyat ajab shai hai

ragon ki daurti surkhi mein to zaten nahin hotin

likhi jati hain sanginon se azadi ki tahriren

kahin khud pesh-e-azadi ki saughaten nahin hotin

jahan shab khun mara ja sake khwabida logon par

kisi bedar millat mein to wo raten nahin hotin

ghata se chhinte hain istada koh-e-barish ko

zamin par lete sahraon pe barsaten nahin hotin

nafir is daur-e-khud agah insanon ki duniya mein

kahin hawi jawan mardon pe afaten nahin hotin