Arooz is now on the App Store, for iPhone and iPad. Download →

All poetry

کیا ہوگا اندازہ تھوڑی ہوتا ہے

Babar Ali Asad (b. 1980)

کیا ہوگا اندازہ تھوڑی ہوتا ہے

ہم نے وقت بنایا تھوڑی ہوتا ہے

میرے ساتھ کھڑی شہزادی لگتی تھی

ہر کوئی شہزادہ تھوڑی ہوتا ہے

ہم نے مال مفت سمجھ برباد کیا

جینا کھیل تماشا تھوڑی ہوتا ہے

وہ جس بات پہ جینا مشکل ہو جائے

اب اس بات پہ مرنا تھوڑی ہوتا ہے

مالک اپنی مرضی کا بھی مالک ہے

مالک نے بتلانا تھوڑی ہوتا ہے

لوگوں کو بس باتیں کرنا آتی ہیں

لوگوں کو کچھ کرنا تھوڑی ہوتا ہے

ہم نے بھی تھک ہار کے آخر مان لیا

وقت نے ہاتھ میں آنا تھوڑی ہوتا ہے

دروازے پر آنکھیں رکھنے والوں کے

دروازوں پر تالا تھوڑی ہوتا ہے