اداسیوں کا ہمیں آسرا شروع سے ہے

اداسیوں کا ہمیں آسرا شروع سے ہے

یہ عارضہ ہے تو پھر عارضہ شروع سے ہے

وہ پورا سچ ہے تو اس کی گواہی آدھی کیوں

اسے خدا سے یہی تو گلا شروع سے ہے

کسی کے رنگ کے مرہون ہیں نہ لہجے کے

کہ ہم میں جو بھی ہے اچھا برا شروع سے ہے

نہ تم نے پوچھا کبھی اور نہ ہم نے بتلایا

وگرنہ گھر کا یہی راستہ شروع سے ہے

تمہیں تو آج زمانہ نے رد کیا ہے مگر

ہمارے ساتھ یہی مسئلہ شروع سے ہے

خدا کا ذکر ہوا ہے تو یاد آیا ہے

ہمارے پاس تو اپنا خدا شروع سے ہے

ہماری آنکھ میں اک خواب ہے تمہارے لیے

مگر یہ شرط ہے وہ دیکھنا شروع سے ہے

ہم اپنے اپنے نصیبوں کی دوریوں پہ کھڑے

ہمارے بیچ کوئی فاصلہ شروع سے ہے

udasiyon ka hamen asra shuru se hai

ye arza hai to phir arza shuru se hai

wo pura sach hai to us ki gawahi adhi kyun

use khuda se yahi to gila shuru se hai

kisi ke rang ke marhun hain na lahje ke

ke ham mein jo bhi hai achchha bura shuru se hai

na tum ne puchha kabhi aur na ham ne batlaya

wagarna ghar ka yahi rasta shuru se hai

tumhen to aj zamana ne rad kiya hai magar

hamare sath yahi masala shuru se hai

khuda ka zikr hua hai to yad aya hai

hamare pas to apna khuda shuru se hai

hamari ankh mein ik khwab hai tumhare liye

magar ye shart hai wo dekhna shuru se hai

ham apne apne nasibon ki duriyon pe khare

hamare bich koi fasla shuru se hai