جو اس طرح سے میں خود کو پچھاڑ لیتا ہوں

جو اس طرح سے میں خود کو پچھاڑ لیتا ہوں

بنا بنایا تعلق بگاڑ لیتا ہوں

میں نا سمجھ تو نہیں رنجشوں سے لڑتا پھروں

میں رخ بدل کے محبت کی آڑ لیتا ہوں

جو گرد ذہن پہ گرتی ہے بد گمانی کی

میں گاہے گاہے اسے خود ہی جھاڑ لیتا ہوں

میں راحتوں سے کبھی مطمئن نہیں ہوتا

میں سوچ سوچ کے خوشیاں اجاڑ لیتا ہوں

یہ درد بھی یوں ہی اٹکھیلیاں نہیں کرتے

کبھی کبھی میں انہیں چھیڑ چھاڑ لیتا ہوں

تمہارے دکھ میں کوئی اور دکھ ملاتا نہیں

میں شب گزار کے خیمہ اکھاڑ لیتا ہوں

کتاب زیست تجھے غم نہیں تھماتا کوئی

میں دن گزار کے صفحے کو پھاڑ لیتا ہوں

jo is tarah se main khud ko pichhar leta hun

bana banaya taalluq bigar leta hun

main na samajh to nahin ranjishon se larta phirun

main rukh badal ke mohabbat ki ar leta hun

jo gard zehn pe girti hai bad gumani ki

main gahe gahe use khud hi jhar leta hun

main rahaton se kabhi mutmain nahin hota

main soch soch ke khushiyan ujar leta hun

ye dard bhi yun hi atkheliyan nahin karte

kabhi kabhi main unhen chher chhar leta hun

tumhare dukh mein koi aur dukh milata nahin

main shab guzar ke khema ukhar leta hun

kitab-e-zist tujhe gham nahin thamita koi

main din guzar ke safhe ko phar leta hun