کس ہنر مندی سے قتل تیرگی کرتے ہیں لوگ

کس ہنر مندی سے قتل تیرگی کرتے ہیں لوگ

میرا کاشانہ جلا کر روشنی کرتے ہیں لوگ

جانے کیسا شہر ہے یہ موت کی آغوش میں

رہ کے بھی ہر وقت جشن زندگی کرتے ہیں لوگ

میں فصیل شب پہ روشن کرتا ہوں دل کا چراغ

گرچہ میرے راستے میں تیرگی کرتے ہیں لوگ

یا الٰہی گلستان زندگی کی خیر ہو

جو نہیں کرنا ہے اب اکثر وہی کرتے ہیں لوگ

دوستی کا گر گیا معیار کتنا آج کل

صرف مقصد کے لئے اب دوستی کرتے ہیں لوگ

مجھ کو کیا معلوم لفظوں کے برتنے کا ہنر

مجھ سے بہتر شہر فن میں شاعری کرتے ہیں لوگ

زندگی کے ہاتھ سے مجبور ہو کر آج کل

خودکشی ہر وقت صابر جوہریؔ کرتے ہیں لوگ

kis hunar mandi se qatl-e-tirgi karte hain log

mera kashana jala kar raushni karte hain log

jane kaisa shahr hai ye maut ki aghosh mein

rah ke bhi har waqt jashn-e-zindagi karte hain log

main fasil-e-shab pe raushan karta hun dil ka charagh

garche mere raste mein tirgi karte hain log

ya ilahi gulistan zindagi ki khair ho

jo nahin karna hai ab aksar wahi karte hain log

dosti ka gir gaya meyar kitna aj kal

sirf maqsad ke liye ab dosti karte hain log

mujh ko kya maalum lafzon ke baratne ka hunar

mujh se behtar shahr fan mein shayari karte hain log

zindagi ke hath se majbur ho kar aj kal

khudkushi har waqt sabir jauhari karte hain log