رہے خرام سلامت ندی کے دھاروں کا

رہے خرام سلامت ندی کے دھاروں کا

نکل نہ جائے کہیں دم مگر کناروں کا

تھا اضطراب و تمنائے دید گل کا کرم

بہت کٹھن تھا سفر ورنہ خارزاروں کا

ستا رہی ہے دل شب کو کل کے چاند کی یاد

اڑا اڑا سا ہے کچھ آج رنگ تاروں کا

جو خوش ہے ایک تو اس کی وفا کے چرچے ہیں

دکھائے دل وہ جہاں میں بھلے ہزاروں کا

یہی ہے لطف تو پھر جور کس کو کہتے ہیں

نہ سمجھا کوئی بھی مطلب ترے اشاروں کا

تن برہنہ ہو جیسے لباس کا محتاج

ہوا ہے شعر بھی مرہون استعاروں کا

اسے تو حسن کی حرمت کا پاس تھا اتنا

کہ کائنات معما ہے پردہ داروں کا

ہو ابتلا سے جہاں عاشقی کی پیمائش

تو کیا عجب ہو وہاں جوش بے قراروں کا

rahe khiram salamat nadi ke dharon ka

nikal na jae kahin dam magar kinaron ka

tha iztirab-o-tamanna-e-did gul ka karam

bahut kathin tha safar warna kharzaron ka

sata rahi hai dil-e-shab ko kal ke chand ki yad

ura ura sa hai kuchh aj rang taron ka

jo khush hai ek to us ki wafa ke charche hain

dikhae dil wo jahan mein bhale hazaron ka

yahi hai lutf to phir jaur kis ko kahte hain

na samjha koi bhi matlab tire isharon ka

tan-e-barahna ho jaise libas ka mohtaj

hua hai sher bhi marhun istiaron ka

use to husn ki hurmat ka pas tha itna

ke kainat-e-muamma hai parda daron ka

ho ibtila se jahan ashiqi ki paimaish

to kya ajab ho wahan josh-e-be qararon ka