کسی صورت مقدر سے پریشانی نہیں جاتی

کسی صورت مقدر سے پریشانی نہیں جاتی

حقیقت وہ حقیقت ہے کہ جو جانی نہیں جاتی

عدو کی لغو گوئی نے کچھ ایسا کر دیا برہم

ہماری صاف سیدھی بات بھی مانی نہیں جاتی

ہمارا راز دل ہی کیا وہ تم پر آشکارہ ہے

حقیقت آپ کے دل کی مگر جانی نہیں جاتی

سر مقتل تڑپتا دیکھ کر وہ تلملا اٹھے

ستم کے بعد اب ان کی پشیمانی نہیں جاتی

کسی عاشق کے دل سے پوچھئے سرگرمیٔ الفت

ہزاروں مشکلیں ہوں پھر بھی جولانی نہیں جاتی

جنون عشق کامل میں یہ پروانے کی عادت ہے

ثبوت عشق کامل کی وہ قربانی نہیں جاتی

جو صورت کوئی بحر عشق میں آئی نظر ہم کو

کچھ ایسی مسخ ہو جاتی ہے پہچانی نہیں جاتی

ہماری قوت برداشت کی پرواہ کیا ان کو

ستم کرنے کی عادت ہے ستم رانی نہیں جاتی

ارے غمؔ مشکلیں تو عشق کی راہوں میں ہیں لیکن

ہے ان میں کون کتنی سخت گردانی نہیں جاتی

kisi surat muqaddar se pareshani nahin jati

haqiqat wo haqiqat hai ke jo jani nahin jati

adu ki laghw goi ne kuchh aisa kar diya barham

hamari saf sidhi bat bhi mani nahin jati

hamara raz-e-dil hi kya wo tum par ashkara hai

haqiqat ap ke dil ki magar jani nahin jati

sar-e-maqtal tarapta dekh kar wo tilmila uthe

sitam ke baad ab un ki pashemani nahin jati

kisi ashiq ke dil se puchhiye sargarmi-e-ulfat

hazaron mushkilen hun phir bhi jaulani nahin jati

junun-e-ishq kamil mein ye parwane ki adat hai

subut-e-ishq kamil ki wo qurbani nahin jati

jo surat koi bahr-e-ishq mein ai nazar ham ko

kuchh aisi maskh ho jati hai pahchani nahin jati

hamari quwwat-e-bardasht ki parwah kya un ko

sitam karne ki adat hai sitam rani nahin jati

are gham mushkilen to ishq ki rahon mein hain lekin

hai un mein kaun kitni sakht gardani nahin jati