بتاؤں کیا شب فرقت میری کیسے سنورتی ہے — Gham Bijnori

Arooz is now on the App Store, for iPhone and iPad. Download →

بتاؤں کیا شب فرقت میری کیسے سنورتی ہے

کبھی تو ہوک اٹھتی ہے کبھی رو رو گزرتی ہے

ادھر تو ٹیس اٹھتی ہے ادھر آنسو ابلتے ہیں

اسی دم کہکشاں تاروں سے اپنی مانگ بھرتی ہے

جنون جذبۂ الفت کی بیتابی معاذ اللہ

جو کم ہوتا ہے درد دل تو پھر وحشت ابھرتی ہے

مری وارفتگی اس جذبۂ دل کی قسم کھا کر

محبت نام لے کر بھی محبت ہی سے ڈرتی ہے

ترا یہ جذبۂ الفت سلامت ہی رہے ہر دم

محبت جب کبھی حد سے گزرتی ہے اکھرتی ہے

ارے غمؔ لغزش سوز جگر کا کیف کیا کہئے

زباں مجبور ہو جاتی ہے جب دل میں اترتی ہے