تجھے کیا بتاؤں اے دل ربا ترے سامنے مرا حال ہے

مجھے جستجو ہے فقط تری مجھے صرف تیرا خیال ہے

ہے نظر میں میری تو تو ہی تو میرا سانس تیرا ہی گیت ہے

میں بھلا سکوں تجھے دل ربا بھلا کب یہ میری مجال ہے

مرے جسم میں تو ہے ہر جگہ مرے ہوش میں تو مقیم ہے

میں مطیع ہوں تیرا ہی دل ربا مرے غم کی رات ہلال ہے

میں تو زندہ تیرے ہی دم سے ہوں مری آرزو کی تو زندگی

تری بے وفائی کی اک نظر مری زندگی کا سوال ہے

تری قربتوں کی طلب مجھے تری دید کی مجھے جستجو

کہ بغیر جس کے اے ماہ رو مری زندگی بھی محال ہے

سر شام ہی سے نہ جانے کیوں ہے جگر میں ٹیس سی درد کی

ترے ہجر ہی میں اے دل ربا یہی عشق کا زر و مال ہے

ترے غم میں غمؔ کو ملا ہے غم تجھے کس طرح سے سکوں کہوں

ترے غم میں ایسی خوشی ملی جو کہ غم کی زندہ مثال ہے