زرد پتوں کو ہوا ساتھ لئے پھرتی ہے

زرد پتوں کو ہوا ساتھ لئے پھرتی ہے

دم گزیدہ ہیں قضا ساتھ لئے پھرتی ہے

راکھ ہو جائے نہ فاقوں کے جہنم میں حیات

بے کسی اپنی چتا ساتھ لئے پھرتی ہے

ماں کے ہونٹوں سے تھی نکلی دم رخصت جو دعا

مجھ کو اب تک وہ دعا ساتھ لئے پھرتی ہے

آس کی راکھ میں ڈھونڈیں نئی امید کوئی

زندگی بیم و رجا ساتھ لئے پھرتی ہے

سچ کا ہے قحط یہاں جھوٹ کا بازار ہے گرم

اب ہمیں موج فنا ساتھ لئے پھرتی ہے

ایک پتھر ہے بہت جھیل کے سناٹے کو

خامشی کوہ ندا ساتھ لئے پھرتی ہے

اپنے سائے سے گریزاں نہیں اک تو ہی ربابؔ

شہر بھر کو یہ وبا ساتھ لئے پھرتی ہے

zard patton ko hua sath liye phirti hai

dam gazida hain qaza sath liye phirti hai

rakh ho jae na faqon ke jahannam mein hayat

be kisi apni chita sath liye phirti hai

man ke honton se thi nikli dam-e-rukhsat jo dua

mujh ko ab tak wo dua sath liye phirti hai

as ki rakh mein dhunden nai ummid koi

zindagi bim-o-raja sath liye phirti hai

sach ka hai qaht yahan jhut ka bazar hai garm

ab hamen mauj-e-fana sath liye phirti hai

ek patthar hai bahut jhil ke sannate ko

khamushi koh-e-nida sath liye phirti hai

apne sae se gurezan nahin ik tu hi rabab

shahr bhar ko ye waba sath liye phirti hai