اس دور میں ایسا کوئی انسان نہیں ہے

اس دور میں ایسا کوئی انسان نہیں ہے

جو سوزش پنہاں سے پریشان نہیں ہے

لے ڈوبی تمنائے گہر مجھ کو بھی یارو

دریا سے ابھرنے کا اب امکان نہیں ہے

ہم پر ہی بس الزام لگا جلتے دنوں کا

اک تلخ حقیقت ہے یہ بہتان نہیں ہے

ہر گام پہ ہے دل کے لٹیروں کا بسیرا

اس راہ پہ چلنا کوئی آسان نہیں ہے

احساس کے ساحل پہ کھڑا سوچ رہا ہوں

لفظوں کے سمندر میں وہ طوفان نہیں ہے

بھونرے تو بہت چاؤ سے پھر آتے ہیں انجمؔ

اور آج مری میز پہ گلدان نہیں ہے

is daur mein aisa koi insan nahin hai

jo sozish-e-pinhan se pareshan nahin hai

le dubi tamanna-e-guhar mujh ko bhi yaro

dariya se ubharne ka ab imkan nahin hai

ham par hi bas ilzam laga jalte dinon ka

ik talkh haqiqat hai ye bohtan nahin hai

har gam pe hai dil ke luteron ka basera

is rah pe chalna koi asan nahin hai

ehsas ke sahil pe khara soch raha hun

lafzon ke samundar mein wo tufan nahin hai

bhaunre to bahut chao se phir ate hain anjum

aur aj miri mez pe guldan nahin hai