دیوار اختلاف کی اتنی بلند ہے

دیوار اختلاف کی اتنی بلند ہے

رسماً بھی اب سلام و دعا ان سے بند ہے

سچ بات کہہ کے سب کی نظر سے ہوئے ہیں دور

تھی کب خبر زمانہ خوشامد پسند ہے

واقف نہیں زمانے کی حق بات سے جو شخص

دنیا سمجھ رہی ہے اسے ہوش مند ہے

اک در پہ سر جھکا کے یہ عزت ملی مجھے

دنیا کے سامنے مرا اب سر بلند ہے

ثابت قدم رہو گے محبت میں عہد ہے

یا صرف یہ معاہدۂ تاشقند ہے

گھائلؔ تمہارے بارے میں کہتے ہیں اب بھی لوگ

ہیں خامیاں بہت مگر اخلاق مند ہے

diwar ikhtilaf ki itni buland hai

rasma bhi ab salam-o-dua un se band hai

sach bat kah ke sab ki nazar se hue hain dur

thi kab khabar zamana khushamad pasand hai

waqif nahin zamane ki haq bat se jo shakhs

duniya samajh rahi hai use hosh mand hai

ik dar pe sar jhuka ke ye izzat mili mujhe

duniya ke samne mira ab sar buland hai

sabit qadam rahoge mohabbat mein ahd hai

ya sirf ye muahada-e-tashqand hai

ghayal tumhare bare mein kahte hain ab bhi log

hain khamiyan bahut magar akhlaq mand hai