جو آ سکو تو بتاؤ کہ انتظار کریں

جو آ سکو تو بتاؤ کہ انتظار کریں

وگرنہ اپنے مقدر پہ اعتبار کریں

چراغ خانۂ امید ہے ابھی روشن

ابھی نہ ترک تعلق کو اختیار کریں

ہمارے طول مسافت کا یہ تقاضا ہے

شریک حال تجھے اے خیال یار کریں

یہ گل رخوں کا ہے شیوہ بہ نام ناز و ادا

نگاہ عاشق بسمل کو اشک بار کریں

یہ اہل عشق کو زیبا نہیں سر بازار

جنوں کے نام پہ داماں کو تار تار کریں

ہمارے آبا و اجداد کا یہ ورثہ ہے

زمین دشت کو سرمایۂ بہار کریں

جواز زندگی ٹھہری ہے جس کی یاد رئیسؔ

اسی سے دل کے تعلق کو استوار کریں

jo a sako to batao ke intizar karen

wagarna apne muqaddar pe etibar karen

charagh-e-khana-e-ummid hai abhi raushan

abhi na tark-e-taalluq ko ikhtiyar karen

hamare tul-e-masafat ka ye taqaza hai

sharik-e-hal tujhe ai khayal-e-yar karen

ye gul rukhon ka hai shewa ba nam-e-naz-o-ada

nigah-e-ashiq bismil ko ashk bar karen

ye ahl-e-ishq ko zeba nahin sar-e-bazar

junun ke nam pe daman ko tar tar karen

hamare aba-o-ajdad ka ye wirsa hai

zamin-e-dasht ko sarmaya-e-bahar karen

juaz-e-zindagi thahri hai jis ki yad rais

usi se dil ke taalluq ko ustuwar karen