یہ مرحلے بھی محبت کے باب میں آئے

یہ مرحلے بھی محبت کے باب میں آئے

بچھڑ گئے تھے جو ہم سے وہ خواب میں آئے

وہ جس کی راہ میں ہم نے بچھائے غنچہ و گل

اسی مکان سے پتھر جواب میں آئے

نہ جس کو دست حنائی کا تیرے لمس ملے

کہاں سے بوئے وفا اس گلاب میں آئے

تمہارے حسن نظر سے ہیں معتبر ہم بھی

جو ہم کسی نگہ انتخاب میں آئے

اگرچہ مثل ہے آب رواں کے ریگ سراب

کہاں سے شورش دریا سراب میں آئے

ترے خیال کا پیکر سجا ہے سینے میں

ہم اس طرح تری چشم خوش آب میں آئے

ہوا کے دوش پہ اس نے لکھا ہے نام رئیسؔ

یہ سن کے لوگ بہت پیچ و تاب میں آئے

ye marhale bhi mohabbat ke bab mein ae

bichhar gae the jo ham se wo khwab mein ae

wo jis ki rah mein ham ne bichhae ghuncha-o-gul

isi makan se patthar jawab mein ae

na jis ko dast-e-hinai ka tere lams mile

kahan se bu-e-wafa is gulab mein ae

tumhare husn-e-nazar se hain motabar ham bhi

jo ham kisi nigah-e-intikhab mein ae

agarche misl hai ab-e-rawan ke reg sarab

kahan se shorish-e-dariya sarab mein ae

tire khayal ka paikar saja hai sine mein

ham is tarah tiri chashm-e-khush ab mein ae

hawa ke dosh pe us ne likha hai nam rais

ye sun ke log bahut pech-o-tab mein ae