تیرے پیکر سی کوئی مورت بنا لی جائے گی

تیرے پیکر سی کوئی مورت بنا لی جائے گی

دل کے بہلانے کی یہ صورت نکالی جائے گی

کون کہہ سکتا تھا یہ قوس قزح کو دیکھ کر

ایک ہی آنچل میں یہ رنگت سما لی جائے گی

کاغذی پھولوں سے جب مانوس ہوں گی تتلیاں

عاشقی کی رسم دنیا سے اٹھا لی جائے گی

آئنے میں بال پڑ جائے تو جا سکتا نہیں

ریت کی دیوار تو پھر سے بنا لی جائے گی

ہم جو کار آذری میں بے ہنر ٹھہرے تو کیا

ان کی صورت شعر کے قالب میں ڈھالی جائے گی

خود پرستی کے نشے میں جن کو ہے زعم جمال

آئنہ دیکھیں تو ان کی خوش خیالی جائے گی

عشق کی فطرت میں ہے پروان ہی چڑھنا رئیسؔ

حسن وہ دولت نہیں جو پھر کما لی جائے گی

tere paikar si koi murat bana li jaegi

dil ke bahlane ki ye surat nikali jaegi

kaun kah sakta tha ye qaus-e-quzah ko dekh kar

ek hi anchal mein ye rangat sama li jaegi

kaghzi phulon se jab manus hongi titliyan

ashiqi ki rasm-e-duniya se utha li jaegi

aine mein bal par jae to ja sakta nahin

ret ki diwar to phir se bana li jaegi

ham jo kar-e-azari mein be hunar thahre to kya

un ki surat sher ke qalib mein dhali jaegi

khud parasti ke nashe mein jin ko hai zaam-e-jamal

aina dekhen to un ki khush khayali jaegi

ishq ki fitrat mein hai parwan hi charhna rais

husn wo daulat nahin jo phir kama li jaegi