میں ایک کانچ کا پیکر وہ شخص پتھر تھا

میں ایک کانچ کا پیکر وہ شخص پتھر تھا

سو پاش پاش تو ہونا مرا مقدر تھا

تمام رات سحر کی دعائیں مانگی تھیں

کھلی جو آنکھ تو سورج ہمارے سر پر تھا

چراغ راہ محبت ہی بن گئے ہوتے

تمام عمر کا جلنا اگر مقدر تھا

فصیل شہر پہ کتنے چراغ تھے روشن

سیاہ رات کا پہرا دلوں کے اندر تھا

اگرچہ خانہ بدوشی ہے خوشبوؤں کا مزاج

مرا مکان تو کل رات بھی معطر تھا

سمندروں کے سفر میں وہ پیاس کا عالم

کہ فرش آب پہ اک کربلا کا منظر تھا

اسی سبب تو بڑھا اعتبار لغزش پا

ہمارا جوش جنوں آگہی کا رہبر تھا

جو ماہتاب حصار شب سیاہ میں ہے

کبھی وہ رات کے سینے پہ مثل خنجر تھا

میں اس زمیں کے لیے پھول چن رہا ہوں رئیسؔ

مرا نصیب جہاں بے اماں سمندر تھا

main ek kanch ka paikar wo shakhs patthar tha

so pash pash to hona mira muqaddar tha

tamam rat sahar ki duaen mangi thin

khuli jo ankh to suraj hamare sar par tha

charagh-e-rah-e-mohabbat hi ban gae hote

tamam umr ka jalna agar muqaddar tha

fasil-e-shahr pe kitne charagh the raushan

siyah rat ka pahra dilon ke andar tha

agarche khana badoshi hai khushbuon ka mizaj

mira makan to kal rat bhi muattar tha

samundaron ke safar mein wo pyas ka alam

ke farsh ab pe ik karbala ka manzar tha

isi sabab to barha etibar laghzish-e-pa

hamara josh-e-junun agahi ka rahbar tha

jo mahtab hisar-e-shab-e-siyah mein hai

kabhi wo rat ke sine pe misl-e-khanjar tha

main is zamin ke liye phul chun raha hun rais

mira nasib jahan be aman samundar tha