Arooz is now on the App Store, for iPhone and iPad. Download →

All poetry

اسے بھلا کے بھی یادوں کے سلسلے نہ گئے

Raees Warsi (b. 1963)

اسے بھلا کے بھی یادوں کے سلسلے نہ گئے

دل تباہ ترے اس سے رابطے نہ گئے

کتاب زیست کے عنواں بدل گئے لیکن

نصاب جاں سے کبھی اس کے تذکرے نہ گئے

مجھے تو اپنی ہی سادہ دلی نے لوٹا ہے

کہ میرے دل سے مروت کے حوصلے نہ گئے

میں چاند اور ستاروں کے گیت گاتا رہا

مرے ہی گھر سے اندھیروں کے قافلے نہ گئے

رئیسؔ جرأت اظہار میرا ورثہ ہے

قصیدے مجھ سے کسی شاہ کے لکھے نہ گئے