تم کہہ رہے ہو نیلے خلا میں رنگوں کا جال پھیلا ہے

تم کہہ رہے ہو نیلے خلا میں رنگوں کا جال پھیلا ہے

میں پوچھتا ہوں رنگوں کے پار پانی کا رنگ کیسا ہے

مجرم ہے دل کہ معمولی آہٹوں پر بھی چونک اٹھتا ہے

کمرے میں ورنہ کوئی نہیں یہ پاگل ہوا کا جھونکا ہے

میں سخت راستوں پر چلا ہوں میرے نشاں نہ ڈھونڈو تم

پتھر پہ خود ہی چل کر بتاؤ کیا کوئی نقش بنتا ہے

کتنے شگفتہ چہروں میں لوگ خود کو چھپائے پھرتے ہیں

پر کیا بتاؤں چہروں کے پار مجھ کو دکھائی دیتا ہے

تم آج ساری سمتوں میں برف سے میرا نام لکھتے ہو

تم جانتے ہو موسم کے ساتھ اس برف کو پگھلنا ہے

دھندلی اداس گلیوں میں لوگ سائے کی طرح چلتے ہیں

منظر اٹھاؤ پلکیں سجاؤ سب کچھ تو خواب جیسا ہے

tum kah rahe ho nile khala mein rangon ka jal phaila hai

main puchhta hun rangon ke par pani ka rang kaisa hai

mujrim hai dil ke maamuli ahaton par bhi chaunk uthta hai

kamre mein warna koi nahin ye pagal hawa ka jhonka hai

main sakht raston par chala hun mere nishan na dhundo tum

patthar pe khud hi chal kar batao kya koi naqsh banta hai

kitne shagufta chehron mein log khud ko chhupae phirte hain

par kya bataun chehron ke par mujh ko dikhai deta hai

tum aj sari samton mein barf se mera nam likhte ho

tum jante ho mausam ke sath is barf ko pighalna hai

dhundli udas galiyon mein log sae ki tarah chalte hain

manzar uthao palken sajao sab kuchh to khwab jaisa hai