جو سمندر ہمیں گھنگھور گھٹا دیتا ہے

جو سمندر ہمیں گھنگھور گھٹا دیتا ہے

وہی قطروں کو بھی دریا سے ملا دیتا ہے

جدت آموز زمانہ ہمیں کیا دیتا ہے

راہ کی دھول سمجھتا ہے اڑا دیتا ہے

مفلسی کتنی تڑپ اٹھتی ہے بیتابی سے

آ کے سائل جو کبھی در پہ صدا دیتا ہے

ضبط کا پیڑ گھنا دل میں لگائے رکھنا

یہ گھنا پیڑ سدا ٹھنڈی ہوا دیتا ہے

تہہ میں جاؤ گے تو موتی بھی ملیں گے تم کو

بلبلہ سارے خزانے کا پتہ دیتا ہے

چین سے رہتا ہے بنیاد کا پتھر اعجازؔ

زلزلہ اونچی عمارت کو گرا دیتا ہے

jo samundar hamen ghanghor ghata deta hai

wahi qatron ko bhi dariya se mila deta hai

jiddat amoz zamana hamen kya deta hai

rah ki dhul samajhta hai ura deta hai

muflisi kitni tarap uthti hai betabi se

a ke sail jo kabhi dar pe sada deta hai

zabt ka per ghana dil mein lagae rakhna

ye ghana per sada thandi hua deta hai

tah mein jaoge to moti bhi milenge tum ko

balbila sare khazane ka pata deta hai

chain se rahta hai buniyad ka patthar ejaz

zalzala unchi imarat ko gira deta hai