آنکھ میں پرتو مہتاب سلامت رہ جائے

آنکھ میں پرتو مہتاب سلامت رہ جائے

کوئی صورت ہو کہ اک خواب سلامت رہ جائے

روز ڈھے جائے یہ ہارا تن و جاں کا لیکن

ڈھیر میں اک دل بے تاب سلامت رہ جائے

وہ کسی خیر خزانے کی خبر دیتا ہے

جو سفینہ پس سیلاب سلامت رہ جائے

دل کسی موج جنوں میں جو لہو سے لکھ دے

ایسی تحریر سر آب سلامت رہ جائے

پیار وہ پیڑ ہے سو بار اکھاڑو دل سے

پھر بھی سینے میں کوئی داب سلامت رہ جائے

لاکھ وہ شوق صحیفوں کو جلا لیں عالیؔ

راکھ میں ایک نہ اک باب سلامت رہ جائے

ankh mein partau-e-mahtab salamat rah jae

koi surat ho ke ik khwab salamat rah jae

roz dhe jae ye hara tan-o-jan ka lekin

dher mein ik dil-e-be tab salamat rah jae

wo kisi khair khazane ki khabar deta hai

jo safina pas sailab salamat rah jae

dil kisi mauj-e-junun mein jo lahu se likh de

aisi tahrir sar-e-ab salamat rah jae

pyar wo per hai sau bar ukharo dil se

phir bhi sine mein koi dab salamat rah jae

lakh wo shauq sahifon ko jala len ali

rakh mein ek na ik bab salamat rah jae