جب بھی بادل بارش لائے شوق جزیروں سے

جب بھی بادل بارش لائے شوق جزیروں سے

خوشہ خوشہ حرف کی بیلیں بھر گئیں ہیروں سے

تم سے ملے تو شہر تمنا کتنا پھیل گیا

کیا کیا خواب نئے تعمیر ہوئے تعبیروں سے

آنکھیں رنگوں کی برساتیں تک تک جھیل ہوئیں

دل نے کیا کیا عکس کشید کئے تصویروں سے

اس کو چھونے کی خواہش نے ہاتھ بڑھائے تو

پھن پھیلائے نکلے کتنے سانپ لکیروں سے

عالؔی دانش کی بستی میں اب سردار وہی

ڈھونڈ نکالے کچھ اندھیارے جو تنویروں سے

jab bhi badal barish lae shauq jaziron se

khosha khosha harf ki belen bhar gain hiron se

tum se mile to shahr-e-tamanna kitna phail gaya

kya kya khwab nae taamir hue taabiron se

ankhen rangon ki barsaten tak tak jhil huin

dil ne kiya kya aks kashid kiye taswiron se

us ko chhune ki khwahish ne hath barhae to

phan phailae nikle kitne sanp lakiron se

ali danish ki basti mein ab sardar wahi

dhund nikale kuchh andhiyare jo tanwiron se