جب کوئی کلی صحن گلستاں میں کھلی ہے

جب کوئی کلی صحن گلستاں میں کھلی ہے

شبنم مری آنکھوں میں وہیں تیر گئی ہے

جس کی سر افلاک بڑی دھوم مچی ہے

آشفتہ سری ہے مری آشفتہ سری ہے

اپنی تو اجالوں کو ترستی ہیں نگاہیں

سورج کہاں نکلا ہے کہاں صبح ہوئی ہے

بچھڑی ہوئی راہوں سے جو گزرے ہیں کبھی ہم

ہر گام پہ کھوئی ہوئی اک یاد ملی ہے

اک عمر سنائیں تو حکایت نہ ہو پوری

دو روز میں ہم پر جو یہاں بیت گئی ہے

ہنسنے پہ نہ مجبور کرو لوگ ہنسیں گے

حالات کی تفسیر تو چہرے پہ لکھی ہے

مل جائیں کہیں وہ بھی تو ان کو بھی سنائیں

جالبؔ یہ غزل جن کے لیے ہم نے کہی ہے

jab koi kali sehn-e-gulistan mein khuli hai

shabnam miri ankhon mein wahin tir gai hai

jis ki sar-e-aflak bari dhum machi hai

ashufta siri hai miri ashufta siri hai

apni to ujalon ko tarasti hain nigahen

suraj kahan nikla hai kahan subh hui hai

bichhri hui rahon se jo guzre hain kabhi ham

har gam pe khoi hui ik yad mili hai

ik umr sunaen to hikayat na ho puri

do roz mein ham par jo yahan bit gai hai

hansne pe na majbur karo log hansenge

halat ki tafsir to chehre pe likhi hai

mil jaen kahin wo bhi to un ko bhi sunaen

jalib ye ghazal jin ke liye ham ne kahi hai