ہم نے دل سے تجھے سدا مانا

ہم نے دل سے تجھے سدا مانا

تو بڑا تھا تجھے بڑا مانا

میرؔ و غالبؔ کے بعد انیسؔ کے بعد

تجھ کو مانا بڑا بجا مانا

تو کہ دیوانۂ صداقت تھا

تو نے بندے کو کب خدا مانا

تجھ کو پروا نہ تھی زمانے کی

تو نے دل ہی کا ہر کہا مانا

تجھ کو خود پہ تھا اعتماد اتنا

خود ہی کو تو نہ رہنما مانا

کی نہ شب کی کبھی پذیرائی

صبح کو لائق ثنا مانا

ہنس دیا سطح ذہن عالم پر

جب کسی بات کا برا مانا

یوں تو شاعر تھے اور بھی اے جوشؔ

ہم نے تجھ سا نہ دوسرا مانا

ham ne dil se tujhe sada mana

tu bara tha tujhe bara mana

mir-o-ghalib ke baad anis ke baad

tujh ko mana bara baja mana

tu ke diwana-e-sadaqat tha

tu ne bande ko kab khuda mana

tujh ko parwa na thi zamane ki

tu ne dil hi ka har kaha mana

tujh ko khud pe tha etimad itna

khud hi ko to na rahnuma mana

ki na shab ki kabhi pazirai

subh ko laiq-e-sana mana

hans diya sath-e-zehn alam par

jab kisi bat ka bura mana

yun to shayar the aur bhi ai josh

ham ne tujh sa na dusra mana