درخت سوکھ گئے رک گئے ندی نالے

درخت سوکھ گئے رک گئے ندی نالے

یہ کس نگر کو روانہ ہوئے ہیں گھر والے

کہانیاں جو سناتے تھے عہد رفتہ کی

نشاں وہ گردش ایام نے مٹا ڈالے

میں شہر شہر پھرا ہوں اسی تمنا میں

کسی کو اپنا کہوں کوئی مجھ کو اپنا لے

صدا نہ دے کسی مہتاب کو اندھیروں میں

لگا نہ دے یہ زمانہ زبان پر تالے

کوئی کرن ہے یہاں تو کوئی کرن ہے وہاں

دل و نگاہ نے کس درجہ روگ ہیں پالے

ہمیں پہ ان کی نظر ہے ہمیں پہ ان کا کرم

یہ اور بات یہاں اور بھی ہیں دل والے

کچھ اور تجھ پہ کھلیں گی حقیقتیں جالبؔ

جو ہو سکے تو کسی کا فریب بھی کھا لے

darakht sukh gae ruk gae nadi nale

ye kis nagar ko rawana hue hain ghar wale

kahaniyan jo sunate the ahd-e-rafta ki

nishan wo gardish-e-ayyam ne mita dale

main shahr shahr phira hun isi tamanna mein

kisi ko apna kahun koi mujh ko apna le

sada na de kisi mahtab ko andheron mein

laga na de ye zamana zaban par tale

koi kiran hai yahan to koi kiran hai wahan

dil-o-nigah ne kis darja rog hain pale

hamen pe un ki nazar hai hamen pe un ka karam

ye aur bat yahan aur bhi hain dil wale

kuchh aur tujh pe khulengi haqiqaten jalib

jo ho sake to kisi ka fareb bhi kha le