جسم کے خول سے نکلوں تو قضا کو دیکھوں

جسم کے خول سے نکلوں تو قضا کو دیکھوں

بت کو رستے سے ہٹاؤں تو خدا کو دیکھوں

ایسا کیا جرم ہوا ہے کہ تڑپتے مرتے

اپنے احساس کی سولی پہ انا کو دیکھوں

بولتی آنکھ کا رس ہنستے ہوئے لفظ کا روپ

بات نظروں کی سنوں یا کہ صدا کو دیکھوں

ان کی قسمت کہ کھلیں روز تمنا کے گلاب

میری تقدیر کہ زخموں کی چتا کو دیکھوں

اس توقع پہ کہ شاید کوئی درویش ملے

غور سے شہر کے ایک ایک گدا کو دیکھوں

مجھ کو تہذیب کے مکتب نے سکھایا ہے یہی

تختیٔ دل نہ پڑھوں رنگ قبا کو دیکھوں

jism ke khol se niklun to qaza ko dekhun

but ko raste se hataun to khuda ko dekhun

aisa kya jurm hua hai ke tarapte marte

apne ehsas ki suli pe ana ko dekhun

bolti ankh ka ras hanste hue lafz ka rup

bat nazron ki sunun ya ke sada ko dekhun

un ki qismat ke khulen roz tamanna ke gulab

meri taqdir ke zakhmon ki chita ko dekhun

is tawaqqo pe ke shayad koi darwesh mile

ghaur se shahr ke ek ek gada ko dekhun

mujh ko tahzib ke maktab ne sikhaya hai yahi

takhti-e-dil na parhun rang-e-qaba ko dekhun